الخميس، 8 مايو 2008

موقف من أرض الحياة !


يوم -زي بقية الأيام !- صحيت الصبح -زي كل يوم يعني!- قررت أني أركب أتوبيس ((مكة)) -الشركة اللي انا مشترك فيها عشان توديني طنطا وترجعني المحلة تاني- في ميعاد 10.30 ص .
وبعدين أوصل على محطة ((البندر)) الساعة 10.37ص وأسأل عم ((عصام)) على أتوبيسات
يرد - بكل برود- ويقولي: مفيش كل العجل راح...
أنا- لسه عندي أمل- : يعني مفيش حاجة هتعدي من هنا تاني...
عم ((عصام)) -وكأن الموضوع مش بايده يعني- : لا بس لو احتاجوا اتوبيسات هبعت عجل..
أنا بقى كنت هولع من الغيظ والغضب وكل حاجة ممكن تولع - خليكي بالك مني بقى دلوقتي لولع فيك!-
فشركة ((مكة)) المحروسة لم تلتزم أبدا بميعاد وأنا غالبا ما أركب في نفس الميعاد وكان الأتوبيس يتحرك 10.45ص أو بعد ذلك أيضا
وأنا لم أتأخر كثيرًا...
خلاص - ما باليد حيلة - قولت هركب في ميعاد الساعة 11.30ص
واقف لوحدي على المحطة في انتظار الأتوبيس - حاجة تقرف!-
وبعدين الأتوبيس جه 11.20ص -واتفرج بقى على المهزلة!-
خد الطلبة اللي على ((البندر)) وبعدين عم ((عصام)) اتصل بيه أم راجع واخد الطلبة اللي على ((المشحمة))
وبعدين طلع على الشعبية -الساعة دلوقتي 11.40ص -
وفي أثناء ذلك اتصلت أحدى الطالبات بأحد الملاحظين -اللي هم بيشوفوا الكارنيهات ليكون حد مزوغ مش من الشركة!-
وقالتله انا جايا في تاكسي وراك قالها بقى تعالي الشعبية بسرعة
وطبعا احنا وصلنا والأتوبيس اتملى على عينه ولسه الهانم ماشرفتش
فطبعا ازاي نمشي من غيرها - ده اتصلت بيا!- (الملاحظ)
وطبعا الأتوبيس كله مستنى وصول الهانم عشان نتحرك !
الساعة دلوقتي 12.00ظهرا
الهانم وصلت واتحركنا

تعليق على ما حدث -على رأي أمل دنقل-
شوفتوا المفارقة ! الميعاد 11.30 طلع 12.00 وأنا جيت الميعاد متأخر 7 دقايق خلاص العجل راح !
والأتوبيس كله استنى عشان طالبة - ده انا لو كنت اتصلت بمين ماكنش هيستناني نص دقيقة!-
عجبي ... عجبي ... عجبي!!!
لنا الله

وكان الله في عوننا على هذه الشركة -اللي مش عارف اوصفها واقول اية!!-

هناك 8 تعليقات:

AmR يقول...

هههههههههه
أدي عيب انك تسكن في المحلة

مالها طنطا :D

Dr.Amor يقول...

نصيبي وقسمتي بقى يا ابو عمرو
هعمل اية؟؟؟؟؟؟؟؟
سيبك انت
المهم أخبار ديوانك اية؟؟؟؟

د / احمد فارما يقول...

هههههههه يا يحج عمرو دنت شايل من الشركه دي اوي..امال لو عرفت انهم سحبوا الكرنيهات انهرده عشان قال ايه الطلبه المفروض تدفع 20 جنيه اصل السولا غلي .. طيب احنا مالنا بالغلو ده

ملحوظه

انا مش في الشركه اساسا هههههه

حسن محمد توفيق يقول...

علشان انت عاشق لكل حاجة جميلة تشعر

بالمرارة من هذا الموقف ..

يا دكتور لا تنسى

نحن فى مصر

شكرا لك

نودى يقول...

ايه دا بجد
وانا اللى كنت ناويه احول مكة
مممممممممممممممم
بس دا طبيعى احنا اكيد اكيد فى مصر

Dr.Amor يقول...

د/أحمد فارما
شكرا لتذكيري بموضوع ال20 جـ
لنا الله

أ/حسن توفيق
شكرا لتشريفك مدونتي المتواضعة
وأنا لن أنسى انني في مصرررررررر
لنا الله أيضا

نودي
والله لو مرتاحة في الشركة اللي انتي فيها خليكي أحسن !

غير معرف يقول...

ههههههههههههههههه

يخرابي عليك ده انا دوخت

قولت ايه اللي وداه مكه وهو في طنطا

ههههههههههههه

معلش بقي مش من البلد دي

بس بجد الموقف وحشششششششششش

لما الاتوبيس يوقف علشان بنت


زمن ستات ستات

مع السلامه يارجوله باي باي يا شنبات

علي راي فؤاد نجم

زمن حريم صحيح

معلش ياعمرو يابني

تعالي اسكندريه وسيبك من بلدكم دي

عندنا هنا في اسكندريه بيعملو حساب للحناطير عن البني ادمين

يعني ولا تقول زمن ستات ولا زمن رجاله

عندنا في اسكندريه زمن حناطير

تلاقي ياخويا وانت ماشي في محطه الرمل والمنشيه(طبعا اماكن مش هتعرفها) ولا بيك ولا عليك

تلاقي حطنورررررر في قفاك ومعاه اتنين سياح

وطبعا الاغنيه الحديثه دولقتي بتقول

اليكس بلدنا بلد حناطير في الدواهي بتتحنطر

وكل عام وقت المرواح بتبقي مش عايزه تروح

وتسيب حنطورنا


معلش يابني طولت عليك بس لو مضايق
فأنا الكيل طفح بيااااااااااااا


اختك شيماء

Dr.Amor يقول...

شيماء
دي انتي شكلك توهتي في الموضوع
ههههههههه
مع يا بنتي كلنا لها
وعند الكيل طفح ليه؟؟؟؟
ابقي شوفي سباك بقى ولا حاجة يشوف الموضوع ده لحسن هتغرقيلنا المدونة كده
ههههههههه
مع تحياتي
يا مدوخاني